大公產品

首頁 > 文章 > 正文

郭偉強囝囝萌爆撐場

時間:2017-08-14 03:15:20來源:大公網

  圖:郭偉強喺柴灣興華(二)邨舉行立法會議員辦事處開幕禮,一家三口笑住影全家福

  工聯會立法會議員郭偉強尋日喺柴灣興華(二)邨,舉行立法會議員辦事處開幕禮,勞工及福利局局長羅致光、中聯辦社工部部長楊茂、行政會議成員黃國健等等都有嚟捧場,星光熠熠。不過,尋日嘅主角除咗郭偉強之外,佢囝囝都非常受歡迎,唔單止眼仔碌碌非常可愛,仲識同局長Say ByeBye,搞到好多嘉賓都爭住同呢兩仔爺影相。

  唔經唔覺,呢個月尾就係囝囝兩歲生日,郭太話囝囝已經識講簡單嘅說話,但就呷醋話個仔特別鍾意爸爸,仲取笑老公唔知係咪訓練得囝囝多,平日叫得最多嘅就係「爸爸」。雖然郭偉強議員生活非常忙碌,但好明顯呢位「廿四孝爸爸」並無因此丟低屋企,因為一家三口影全家福嘅時候,郭偉強一個飛抱轉圈,就令到原本唔笑嘅囝囝展開燦爛笑靨,完全知道個仔嘅性格,認真Sweet。

  至於點解會揀興華(二)邨呢個老區開辦事處?郭偉強話,原因之一係筲箕灣嘅辦事處被大幅加租,非常唔合理,於是搬上嚟;但最主要嘅係以興華(二)邨為據點,將服務遍布至全個柴灣。

最新要聞

最新要聞

最受歡迎