圖：市民Desmond Hui在小西灣家中成功攝得流星雨/Desmond Hui提供

　　英仙座流星雨喺剛過去嘅周六晚至周日清晨劃過長空，吸引唔少市民「頭岳岳」觀星拍攝，當中包括民建聯議員陳恒鑌，不過等嘅人多，睇到嘅人少。天文學會掩星組組長余惠俊同鄭晴講，雖然今次流星雨屬於「極大期」，但最終喺香港只見到40粒左右，說好了的150粒？不似預期囉！加上尋晚係弦月，較為光亮，形成光害，觀測條件只屬一般。

　　今次英仙座流星雨最佳觀測時段，由上周六晚九點半開始至周日清晨五點左右，國際流星組織預測，每小時最多可能有150粒流星。講到咁犀利，加上周末噃，自不然吸引大批人去「追星」啦，熱點之一嘅大埔大尾督，前晚入夜後人頭湧湧，附近馬路仲一度大塞車，有網民笑稱今次真係「督尾（排）到去龍尾」啦！

　　人人都去湊熱鬧，不過好多人都話睇唔到。天文愛好者Desmond Hui就醒目，選擇安坐小西灣家中，用單反數碼相機拍攝，佢同鄭晴講，配合時間掣，唔使捱眼瞓，都影到幾張靚相㗎，歡迎同大家開心「些牙」喎。

　　錯過咗今次機會？唔需要太過可惜，因為由10月起，獵戶座、獅子座、雙子座流星雨排住隊嚟！（見表）觀測條件仲分別評為「良好」同「極佳」，隨時比今次更加星光燦爛呀！