尋日中午，上千巴士迷喺33℃高溫下暴曬排隊，有超級巴士迷甚至清晨六點就到場，為乜呢？咪就係想搶到限量版紅巴明信片、紅巴模型囉，仲有係要同紅巴嚟個親密selfie或合照。九巴尋日舉辦「1A@紅巴體驗日」活動，全港30架紅巴，呢一日全部行走1A線，滿足一眾巴士迷坐紅巴嘅心。
中午12點，現場已經大排長龍，人聲鼎沸，天氣熱辣辣，都不及巴士迷熱情如火。11歲嘅小巴士迷許偉宏同爸爸一齊，早晨九點已經到場排隊，無懼烈日當空，排咗三粒幾鐘，真係熱到成身濕曬，但就如願買到紅巴模型。佢好興奮咁同鄭晴講，連埋呢架新寵紅巴，已經收藏咗10架巴士模型啦，佢仲話：「紅巴顏色鮮艷咁有特色，一定要入！」
超級巴士迷劉先生話，自小鍾意研究巴士，為咗「野生捕獲」紅巴，自從紅巴喺六月尾開始行走三條線，佢就特登走去搭曬三條線。紅巴啟航版模型佢早已在手，但限量版明信片就未「集郵」，所以尋日特登提前四個鐘，朝早八點已到場排隊等。佢大讚紅巴顏色搶眼，座椅低特別舒服，仲有Wi-Fi、USB充電位，夠曬貼心，深得佢心。
