大公產品

首頁 > 港聞 > 正文

全球獨有體驗 StellaLou迪園同你合照

時間:2017-08-11 03:15:16來源:大公網

  圖:想同StellaLou合照?就只可以去香港迪士尼喇

  長長嘅耳仔,閃爍嘅眼睛,聽到音樂就會情不自禁咁翩翩起舞,原來呢個係迪士尼小熊Duffy最新嘅好友芭蕾舞小兔StellaLou,佢正式進駐香港迪士尼樂園喇!

  尋日喺香港迪士尼嘅Duffy好友迎新派對上,鄭晴見到來自日本嘅岩野聡美專程前嚟同StellaLou影相,佢好興奮咁話:「呢個係香港獨有嘅體驗!」原來而家全世界得香港迪士尼可以畀你同StellaLou近距離互動合照。

  StellaLou唔單止睇落好可愛,仲有個勵志嘅夢想,佢好希望可以成為舞蹈家,登上百老匯嘅舞台。超級粉絲黃先生就收藏咗迪士尼小熊Duffy同好友系列12年,收藏品超過一萬件,佢話:「好鍾意佢哋背後嘅故事,追求夢想好勵志。」

  鄭晴尋日聽香港迪士尼樂園度假區商品運營綜合策劃經理陳偉賢話,迪士尼自2010以嚟陸續引入Duffy同好友系列,一直深受歡迎,單係毛公仔而家就已經賣咗超過20萬件。之後迪士尼仲會推出近40款StellaLou獨家主題商品,而家咁啱暑假,大家得閒可以去同StellaLou親密接觸下喇!

最新要聞

最新要聞

最受歡迎