圖：六個政策局嘅11位新任副局長同政治助理，尋日「拉大隊」同傳媒食咖喱餐

　　現屆政府強調管治新風，官員要面向公眾，六個政策局嘅11位新任副局長同政治助理，尋日「拉大隊」同傳媒食咖喱餐。幾位公務上同近日熱點新聞有關嘅副局，就最唔得閒，咖喱餐全程畀記者圍住追問，例如教育局副局蔡若蓮，一上任就遇上興德學校事件，尋日嗰餐，佢真係答到喉乾，但都無時間飲水。佢話上任後希望盡快「熟書」，依家一日瞓得四個鐘，連陪屋企人都無時間，但佢決定接任副局時，得到老公同兩個囝囝嘅支持。

　　食衛局副局長徐德義、環境局副局長謝展寰就因為公務繁忙，咖喱餐上要早走。徐副局要同局長陳肇始「孖咇」巡醫院，謝副局就要趕去大嶼山，視察受棕櫚硬脂污染影響嘅沙灘。謝副局前日一句「即食麵都有棕櫚油」，惹起爭議，佢尋日話自己比較直腸直肚，講嗰陣係因為自己經常食即食麵，睇過成分係有棕櫚油，絕對唔係話想淡化事件。謝副局原本係環境保護署副署長，就快退休，但仍然加入「熱廚房」，佢坦言曾經有過掙扎，但最後都希望繼續服務社會。

　　至於勞工及福利局副局長徐英偉，經歷上任就即被問最低工資金額一役，而家已經「溫書」，熟讀數據外，亦理解背後政策理念，當前最忙係就取消強積金對沖約見不同團體。