大公網8月4日訊 為中國人民解放軍建軍90周年獻禮嘅電影《建軍大業》，近排係電影院熱映，經民聯前排就喺港澳兩地舉行咗首映禮，好多政商界、電影業界朋友都有捧場，非常成功。經民聯監事會主席、寰亞電影老闆林建岳今日就撰文，大讚《建軍大業》製作非常嚴謹，落咗唔少工夫還原歷史，戲中好多爆破場面，都係真正嘅爆破，無後期電腦特效加工，可觀性非常高，佢睇過好幾次，仍覺蕩氣迴腸。林建岳又話，呢部咁大製作嘅電影由香港導演劉偉強執導，絕對係香港人嘅驕傲，仲係兩地電影業界合作，共同發展更大華語電影市場嘅又一例證。
經民聯亦透過首映禮作籌款活動，經民聯主席盧偉國同鄭晴講，今次籌款成績理想，又稱讚呢部兩地合拍片水準很高，預期會取得完美成績。經民聯副主席林健鋒就話，《建軍大業》嘅上映好有意義，可讓市民重溫歷史，令年輕一代感受家國情懐，入面有很多發人深省嘅地方，激盪人心，希望年輕人學習前輩嘅熱血與激情，有自律同奮鬥精神，了解富國強兵嘅重要性。
