圖：安安已經31歲，相當於人類93歲，係全球最長壽圈養雄性大熊貓 /大公報記者何嘉駿攝

　　海洋公園大熊貓盈盈、樂樂，「造B」進展一直受到全城關注，佢哋兩位今年四月，四度共處「曳曳」，但可惜自然交配又再「食白果」，需要公園進行四次人工受孕，增加懷孕機會。海洋公園話，盈盈上月出現懷孕跡象喇，但唔排除假懷孕嘅可能，所以而家要密切監察，「大熊貓之旅」展館暫時關閉，想去海洋公園探盈盈、樂樂，可能仲要等多幾個月。

　　鄭晴尋日聽海洋公園陸生動物部高級館長祝效忠講，樂樂雖然已經受訓，但交配時仍然腳仔軟，後肢力量不足。自然交配不成，園方按照中國大熊貓保護研究中心建議，為樂樂取新鮮精液，又動用冷藏多年嘅安安精液，四月幫盈盈做咗四次人工受孕。盈盈上月胃口細咗，瞓得長咗，荷爾蒙水平有變化，可能係夢熊有兆，但由於佢唔肯做超聲波檢查，家下都未知係咪食詐糊，估計要到十月先確定。

　　門票買二送一 港人專享

　　盈盈、樂樂要閉關，但香港勝在還有安安！安安伯伯已經31歲，相當於人類93歲，係全球最長壽圈養雄性大熊貓。為慶祝三隻大熊貓八月份生日，推出港人專享「買二送一」門票優惠，截至本月27日，現場正價買兩張成人門票，即送一張小童門票。海洋公園行政總裁李繩宗話，希望本地家長帶埋細路，趁暑假入園玩。佢又話，海洋公園七月份入場人次按年有增長，七月夜場門票就形容係「可以更理想」，希望八月份會好番啲咁話。