圖：書展完咗之後，兩個志願機構回收棄書作慈善用途 受訪者提供

　　書展曲終人散，但故事未完。主辦單位貿發局安排兩個志願機構，回收棄書作慈善用途，其中，環保團體「曙光計劃」收到約4000本書，種類包括旅遊、烹飪、小說、漫畫等，計劃最快今個周末免費派發。

　　鄭晴同「曙光計劃」主席何峻維傾過，今年已經係第二年參與回收書展棄書，尋日晨早九點幾，佢哋一行九人連同義工去會展中心收書。對比去年，今年回收書量減少兩成，佢估計同書商今年做好銷售預測有關，令滯銷情況減少，棄書量亦相應減少。

　　何生話，今次租車連人工計算，用咗三千幾元，經初步點算，回收書以過期雜誌、小說、漫畫、運程書、電腦工具書為主，一啲較為大眾化，好似旅遊同埋烹飪書都有，有待義工分類，暫時計劃喺未來兩個周末免費派發，預計會喺屯門會址或友好團體合作的地方派發，詳情會喺「曙光計劃」網頁公布。

　　貿發局老友記同鄭晴講，除咗「曙光計劃」，仲有邀請咗基督教勵行會參與回收，書展剛完，尋日下晝清理點算，初步統計有100箱，比舊年多咗50箱。老友話，捐贈行動目的係物盡其用，由書商收集書本，捐畀慈善團體。至於唔捐贈但又棄書嘅書商，貿發局講明會記錄在案，如果出年再參展，會被扣除按金。