圖：颱風「洛克」周日快閃襲港，當日就有兩隻紅耳鵯雀BB喺天文台出世 　　網上圖片

　　颱風「洛克」周日快閃襲港，幸未帶來嚴重破壞，再次證明香港係福地。天文台台長岑智明前夜喺Facebook報喜，打風當日，兩隻紅耳鵯雀BB喺尖沙咀天文台出世啦，台長都話：「哩（呢）次真係好彩風唔大！」網民畀like之餘，紛紛提議為「風之鳥」命名，有人提議叫「洛克」、「明明」，但鄭晴覺得最有創意係呢兩個——「智明」與「春嬌」。

　　由智明台長提供嘅照片可見，兩隻「風之鳥BB」頭岳岳，擘大個嘴等媽媽餵食，可愛到一個點！猶記得早前康文署喺大埔砍樹導致鷺鳥BB慘死，有網民感慨地留言：「天文台範圍裏的確係雀鳥伊甸園」。有網民認為風暴下小生命誕生係「好兆頭」，可以「為天文台帶來生氣」。

　　性格活潑 鍾意嘰嘰叫

　　鄭晴翻查資料，紅耳鵯又稱高髻冠，花名叫做「Gel頭雀」，因為頭頂嘅直立羽冠，好似人類嘅「飛機頭」髮型，眼下後方呈紅色塊斑，頰部白色，其實都幾易認得出。紅耳鵯成鳥喜歡結群活動，性格活潑善鳴，鍾意企喺樹上鳴唱或嘰嘰叫，真係好得意呀！

　　最近天氣持續酷熱，尋日下晝仲錄得高溫34.4度，係今年最熱，未來一周繼續酷熱，希望唔會熱親雀仔BB喇。