圖：楊局長同年輕人行書展，分享讀書心得
一年一度書展踏入尾聲，唔少局長先後出席。尋日就有教育局局長楊潤雄同一班年輕人行書展，佢推介咗《The Paradox of Choice》同《解憂雜貨店》兩本書籍，又到青協攤位買咗幾本書，包括《跌倒，再彈起》、《不要放棄字療》等。講到讀書習慣，相信唔少人都知前教育局局長吳克儉月看30本書或雜誌，楊潤雄就冇直接答鄭晴一個月睇到幾多本啦，只係笑笑口話「你估下」。
楊潤雄由副局長「升呢」局長，工作好忙，佢話而家睇書「睇慢咗、睇少咗」，又話自己睇書嘅種類「好雜」，小說又睇、特首鍾意睇嘅愛情小說佢都啱睇，中、英文書又會睇，就連日本漫畫《多啦A夢》佢都有睇過。多啦A夢有咁多法寶，佢最想用邊樣？佢就話「時光機」好好用，可以幫佢重返大學時代，因為大學氣氛好好，好想返去再感受多次。佢又話，中學時代都會同朋友周圍hea、打波、通宵唔返屋企，仲會整蠱嚇老師，估唔到局長年少時都幾反斗。
鄭晴
