羅智光與實習生合影(圖片來自公務員事務局Facebook專業)
大公網7月25日訊（記者龔學鳴）特區政府每年暑期都會招同學仔入去實習。公務員事務局局長羅智光今日就去咗公務員培訓處，同八位就嚟完成暑期實習嘅大學生見面，了解佢哋呢次學習旅程。
羅智光向實習生分享經驗
聽到實習生Carmon話，曾經幫手搜集減壓良方，上載公務員易學網畀同事參考，喜愛音樂嘅羅智光就順勢分享佢嘅音樂減壓法，話佢聽音樂或者彈奏電風琴嘅時候，精神完全集中喺嗜好上，壓力就會不翼而飛。
羅智光又同實習生分享自己留學英國個陣喺餐館做暑期工嘅體驗，仲即場示範點樣單手捧住三隻碟，亦提到自己學識應對有唔同要求嘅顧客。羅局長最後仲鼓勵同學畢業後加入政府，服務社會添。
