圖：林建岳（左三）話50公里組別參賽名額將增加至2600個
話說新鴻基地產發展有限公司執行董事郭基煇一向熱愛踩單車，仲話每個星期都要踩返一兩晚先得。佢尋日同鄭晴分享舊年參加旅發局香港單車節嘅體驗，話雖然要晨早流流五點幾起身參賽，但一經過青馬大橋，望到靚靚嘅日出，就覺得好正好吸引！佢話為咗等更多參加者都可以欣賞青馬大橋嘅美麗景色，所以今年10月8日舉行嘅香港單車節，路線會改為先經青馬大橋，再到汀九橋同昂船洲大橋。
旅發局主席林建岳亦透露，今年有九項活動同比賽，其中「國際專業公路繞圈賽」更成為亞洲巡迴賽分站賽事，係香港有史以來首次舉辦UCI級賽事，贏咗就可以得到車手戰衣、獎金同UCI積分，真係型爆！岳少對呢個專業賽事好有信心，預計吸引唔少職業隊伍嚟港參賽。佢又話，今年徇眾要求，50公里組別參賽名額將增加300個名額至2600個，預計單車節會破往年紀錄，共吸引超過五千人參加。
今年係香港特區成立20周年，大會隆重其事，增設特區成立紀念杯賽事。如果大家有興趣參加，就要喺今個月22日上午十點開始，到http://register.hongkongcyclothon.com報名啦。
