講起工展會，香港人都唔會陌生啦！不過內地就可能比較陌生。廠商會行政總裁楊立門尋日喺傳媒飯局就話，廠商會嚟緊九月底就會喺武漢舉行工展會，出年就可能喺廣州、西安或者瀋陽舉辦工展會，視乎參展商嘅意願同喜好，同埋內地人都鍾意港商產品。
佢又話，而家都愈嚟愈多人買本地產品，例如駱駝牌水壺，所以對於港商都有信心。另外，有行家就提議，而家咁興VR（虛擬實境），不如今年工展會加入VR元素，楊立門就笑笑口話考慮加入電競比賽同VR體驗等元素！
做咗行政總裁都有兩個月，唔知楊立門慣唔慣呢？佢就話，其實自己以前喺政府做嘅時候，都經常接觸商界人士，所以都無咩磨合期，工作順利，例如接待外地或內地商會，有時可能要一日接待兩個唔同地方嘅商會添。
佢仲話，不時有額外福利，例如收到會董送米呀、送油呀，甚至係廁紙添。
