圖：羅君兒新書《歷劫生命》以第一人稱講咗好多綁架過程中不為人知嘅細節
Bossini創辦人羅定邦孫女羅君兒（Queenie）被綁架案，喺兩年前轟動全城。Queenie在事件後曾獨自召開記者會，當時佢堅強嘅表現畀鄭晴留低深刻印象。
尋日鄭晴收到Queenie新書《歷劫生命》。書中以第一人稱講咗好多綁架過程中不為人知嘅細節。例如將Queenie由屋企綁走個陣，見她身上所穿嘅衫唔夠，會叫佢穿埋長褲同厚外套，仲允許佢自行選擇衣物。而Queenie雖然被囚禁喺山洞帳篷，但綁匪每次進入帳篷之前都會先徵得佢嘅同意。飲食方面，亦會按Queenie要求提供排骨飯同腸仔包，而綁匪自己只係食超市買嘅餅乾同蛋糕。綁匪仲對Queenie「敞開心扉」，話綁架係因為「走投無路」，自己嘅夢想淨係「生存」。
Queenie經此一役，並無沉浸喺綁架嘅陰影中，思想反而更為成熟：「與其抱怨我為何被綁架，倒不如感謝上帝眷顧，自己仍然生存」、「與其將焦點放在整個綁架經歷，倒不如集中到當下工作，思考如何激勵他人」。Queenie舊年仲以櫻花為題舉辦《SAKURA》攝影展，其中多幅作品亦都收錄喺新書入面。
