圖：買到果汁，梗要「打返張卡」威下啦」大公報記者蔡文豪攝
遼寧艦航母編隊嘅官兵平時嘅飲食究竟係點？相信唔少人都好好奇。鄭晴尋日參觀咗導彈驅逐艦銀川艦，得知入面原來有200幾個官兵咁多，又發現艦上竟然有自動販賣機，可以買飲品，種類都幾多下，主要係內地嘅品牌，不過只接受用人民幣畀錢。有參觀嘅市民就好醒目，隨身帶咗「人仔」，可以一嘗銀川艦嘅飲品，佢哋每人用五蚊買返一支檸檬味嘅果汁飲料，仲話味道都唔錯添。
