圖：演出非常精彩，大家熱烈鼓掌\大公報記者攝

　　全城矚目嘅「遼寧」號抵達港首晚，邀請咗一眾政商界代表登艦，喺艦上機庫搞咗場別具一格的「甲板招待會」，嘉賓喺機庫享受一次非一般的把酒暢敘：一邊觀賞兩架殲-15戰鬥機，一邊吃美食、甜品兼品嘗美酒，仲有多項文藝表演迎賓，包括海軍軍樂團演奏多首樂曲，海政歌舞團梁辰仲演唱《我的祖國》等多首歌曲，真係「樂滿『遼寧』號」，嘉賓聽到出曬耳油！

　　天籟之音仲有我哋嘅愛國歌手，鄭晴八到，喺大家等駁船時，港區全國人大代表張明敏就即興玩Live，高唱《我的中國心》，更徇眾要求encore，同埋另外兩位人大代表吳秋北同王庭聰合唱《愛拼才會贏》。

　　為表示誠意，海軍仲特意唱返幾首廣東歌回敬，除咗唱我哋耳熟能詳嘅《獅子山下》，仲有一位女兵獻唱鄧麗君嘅《漫步人生路》，嘉賓梗係拍爛手掌呀！

　　雖然嘉賓唔係真係上到甲板，但有與會者同鄭晴講，行入艦中去廁所嘅時候，見識到艦裏面好多儀器同設施，非常之新奇，又講笑話隻艦太大，如果要參觀曬成隻艦，少啲體力都唔得。

　　另外，民建聯立法會議員蔣麗芸（Ann姐）提到登艦時嘅小插曲，佢話立會議員搭嘅最後一艘登艦接駁船比較細，所以風浪較大，「不過唔緊要，我哋全部都身手敏捷，一跳就跳到上去！」至於身手無咁好嘅，海軍都好貼心咁協助慢慢登艦，唔使驚噃！