圖：「撒尿小童」換上香港服裝慶祝香港回歸
17世紀初嘅噴泉銅像「撒尿小童」係比利時布魯塞爾最具代表性嘅市標。呢個「小朋友」喺當地時間6月30日，換上香港服裝一日，搖身一變成為「潮童」，作為慶祝香港回歸祖國，以及香港特別行政區成立20周年慶祝活動之一，吸引唔少人影相留念。
「撒尿小童」着住嘅香港服裝，由香港駐布魯塞爾經濟貿易辦事處於2012年贈予布魯塞爾市，旨在宣揚香港係秉承中國傳統文化嘅現代化都會。呢套衫嘅設計融合咗突顯香港中西薈萃嘅特徵，配有香港特區飛龍圖案及彩色絲帶嘅黑色中式上衣，搭配一條時髦嘅黑色牛仔褲，襯上白色鞋帶嘅紅色鞋。套衫仲包括一副象徵科技驅動現代城市生活嘅平板電腦添。
唔講唔知，原來「撒尿小童」一年內會喺指定日子總共裝扮130次，亦會經常收到新衫。
「撒尿小童」嘅「衣櫃」，設於布魯塞爾市博物館專設大樓，至今收藏超過900套衫。「撒尿小童」上一次着呢套香港服裝，係時任商務及經濟發展局局長蘇錦樑喺2015年10月訪問布魯塞爾期間。
