馬時亨設宴歡送六名前局長
時間：2017-07-03 22:13:44來源：大公網
記者龔學鳴報道：早排一套劇集令到「陪着你走」呢首舊歌再度紅返，估唔到已經卸任嘅局長都幾熟呢首歌，仲唱得幾好添！港鐵主席馬時亨尋晚擺咗十圍歡送六位前局長，包括高永文、張雲正、譚志源(Raymond)、蘇錦樑(Greg)、陳家強(KC)同埋張炳良。呢六位前局長就高歌一曲「陪着你走」答謝大家啦！首先Greg就先唱一句，熱一熱身，之後其他前局長都無咁尷尬，個個都跟住唱。唱到中段，現場觀眾向一班前局長獻花添！Greg真係好投入，又同KC搭膊頭，仲同Raymond你眼望我眼，去到最後更加拗腰飆高音，真係去到忘我境界呢！
除咗前局長獻唱，一班立法會議員同前立法會議員都有唱返首「輪流轉」回敬，包括立法會主席梁君彥、經民聯主席盧偉國、副主席林健鋒、前立法會主席曾鈺成、財委會主席陳健波，仲有「田氏兄弟」田北俊同田北辰添。田二少話，選呢首歌就係因為新政府又係新嘅一次輪流轉，希望同各位新局長辯論之餘，台下可以飲返杯喎！不過呢，大少就只係打拍子，無開金口，二少就解釋，因為台下嘉賓有「歌神」張學友，所以大少就唔想班門弄斧喎！
最新要聞
