圖：梁振英罕有上載同司局長一齊玩自拍
特首梁振英（CY）與學生Selfie（自拍）見得多，大家又有無見過CY同自己班子一齊Selfie呢？CY前日喺facebook罕有上載一張Selfie，當中包括財政司司長陳茂波、食衛局局長高永文、發展局局長馬紹祥、政制及內地事務局局長譚志源、環境局局長黃錦星同埋創科局局長楊偉雄。大家都笑得好燦爛，張相仲影得幾好添，睇嚟CY平日都應該訓練有數。呢張相就係喺國家博物館展出嘅「香港回歸祖國20周年成就展」綵排後留念嘅。
講起國家博物館嘅香港回歸成就展，去過嘅政界人士都讚不絕口。行政會議成員、經民聯副主席林健鋒（Jeffrey）尋日就喺Facebook發帖，話今次展覽入面有好多極具意義嘅展品，例如當年回歸升起嘅國旗同區旗原裝正品，意義非凡添，仲呼籲喺北京嘅朋友記得去睇下呢！Jeffrey又話，睇住啲咁有意義嘅展品，真係光陰似箭。祖國發展日新月異，加上中央政府支持之下，香港先至有顯著成就，渡過一個個難關。Jeffrey又期望新一屆特區政府同社會各界同心創前路，掌握新機遇，令香港再綻光芒。
