圖：劉國勳（左四）話能夠推出優惠，證明有心無難事」大公報記者陳卓康攝

　　回歸二十周年大好日子，九巴同小巴都破天荒跨區益下乘客。九巴同港島區小巴公司進智公交合作，推出轉乘優惠，乘搭24條九巴獨營過海線，轉搭45條進智公交小巴線，第二程可以平一蚊，優惠期由七一起，直到今年大除夕。

　　玉成呢件好事嘅，係民建聯議員劉國勳，佢話今年五月開始接觸兩間公司，估唔到一拍即合，仲得到運輸署「極速批核」同八達通公司嘅配合。劉國勳又話，港鐵咁大間公司都係得三毫子優惠，反而巴士同小巴出手就慳一蚊，證明有心無難事，又反映競爭者亦能夠成為合作人，巴士接駁小巴仲可以實現更好協調和分工。

　　冀再推優惠益大眾

　　劉國勳黨友、另一議員張國鈞就話，慶回歸唔係淨係得文藝活動，搭車優惠算係新意思，希望今次只係開始，將來多合作提供更多優惠，益到更多基層大眾。

　　進智公交行政總裁陳文俊話，每日約有400人次由港島小巴轉搭九巴，優惠對佢哋財政影響不大，暫難估計有幾多人受惠，半年後再作檢討。九巴商務總監唐東明就話，方便到更多市民係值得嘅。

　　提提大家，優惠僅限成人及學生八達通，不包括小童以及兩蚊搭車嘅長者，轉乘要喺180分鐘內進行，兩程之間唔可以搭其他交通工具，亦唔可以同其他轉乘優惠共用。