圖：「Marvel危機次元任務」，穿梭不同的次元，協助多位超級英雄突破重重關卡

　　各方漫威（Marvel）英雄迷注意，香港迪士尼樂園今個夏天又有新搞作！一眾漫威英雄即日起至九月三日，登陸園內展藝館。除咗鋼鐵奇俠（Ironman）之外，美國隊長、蜘蛛俠、奇異博士、黑寡婦、雷神托爾同星爵，終於現真身。或者你會問點解咁鍾意佢哋，等鄭晴答下你啦。「巴閉囉，英雄主義，疊馬……」。入嚟玩，集郵是常識吧！

　　今次「Marvel夏日超級英雄」主題活動包括「Marvel危機次元任務」、「躍」見蜘蛛俠同埋美國隊長英雄會面禮。遊客參與次元任務中，需要同多位英雄協力拯救世界。至於其餘兩個活動，唔多講啦。梗係同美國隊長、蜘蛛俠影餐飽啦！呢位蜘蛛俠除咗「擺pose」叻，仲識用廣東話自我介紹，夠曬親切。

　　略嫌影相、互動未夠喉？迪士尼同漫威合作，推出全球首本限定版嘅Marvel紙本漫畫。故事以香港為背景，講述鐵甲奇俠同幾位超級英雄聯手對抗邪惡勢力。入面不單止有新英雄登場，仲搵埋香港漫畫作家黃孝勇及香港畫家黃毅龍，用咗兩個月時間構思同製作。粉絲一定要收藏！

　　鄭晴聽迪士尼樂園娛樂事務及服裝部創作總監華文迪講，漫威熱潮呢幾年hit爆全球，而香港首個漫威主題遊戲「鐵甲奇俠飛行之旅」自今年初推出以來，帶動入場男性遊客錄得雙位數增長。就咁聽落，唔知下次輪到邊位漫威英雄，出手拯救地球，順手拯救香港迪士尼業績呢？