大公網6月13日訊（記者冼國強報道）網友謔稱為「西瓜琦」嘅本民前梁天琦，日前終於蒲頭啦！佢係劍橋大學香港及中國事務會發表演講，繼續唱衰香港，又話自己離開咗香港五個月在海外讀書，英文好咗添，自己可以做嘅就係繼續進修自己，完咗英國演講，之後就會到美國同加拿大演講。嘩！自己就係外國風流快活，仲係度講風涼說話。
不過呢，問答環節先精彩，有觀眾問到西瓜琦點睇本土派應唔應該參加遲啲嘅立法會補選，一向攻擊泛民作為政治資本嘅西瓜琦居然話，本土派應該同泛民合作，因為咁嘅環境之下，本土派都無咩人可以出選，要保住梁頌恆、游蕙禎原本嘅議席先係最重要，希望本土派同泛民進行初選或辯論，咁先係最有利做法喎！呢番說話當然激死一班本土派支持啦，有人就問到，點解梁天琦而家屈尾十，由批評泛民去到同泛民合作，西瓜琦就話，「但係香港都變到咁，成班人都去哂坐監，仲有本錢內鬥咩？無啦，仲關唔關邊個揸住民主運動大旗的事？呢個已經唔係問題。」
網民狠批梁天琦的行為，網民cll4793表示：「本土賊黨，監獄咪系歸宿囉！」另一網民buddy-wah就話：「衝呀, 成班蠢人衝去坐監, 有人 就 un un 腳 嘆世界 。」
