「熱普城」內鬥風波近日派嘅「花生」愈來愈多，知名網民仇思達（「無敵神駒」）日前喺facebook直播，播出一段聲稱係「熱血公民」主席鄭松泰喺內部會議嘅「絕密錄音」，講到「熱狗」同青年新政梁頌恆、游蕙禎嘅種種恩怨。在錄音中，鄭松泰爆粗話，「響9月至到去1、2月，梁頌恆、游蕙禎呢啲X你，呢啲佢哋應該死啦！冚XX」佢仲話，問題係佢要喺公眾場合同梁游扮friend，畀其他人知道熱狗幫緊佢哋，「因為大眾白痴呀嘛！佢哋以為我哋係本土派嚟㗎嘛，你明唔明呀？本土派同一陣營嚟㗎嘛」。
把聲擺到明係鄭松泰，佢惟有焗認，喺facebook發帖話「我在『熱血公民』工作組所發表的工作匯報和內部溝通被人流出了。對於有手足沒有遵守黨規和破壞內部溝通指引，本人深表遺憾。」之後仲要為自己「白痴論」喺度兜，話「9月4日當日有份支持梁遊而令教主黃毓民敗選的人，全部都是智力有問題。」大批網民好似如夢初醒，話鄭松泰兩面三刀，仲有人話佢愧對選民，以後都唔使旨意選到了哦。其實大家而家知道都唔算遲呢！
（文/鄭晴 大公文匯全媒體新聞中心製圖）
