唔講唔知，民建聯主席李慧琼（Starry）（圖左二）仲做過龍舟比賽嘅司儀。佢尋日以嘉賓身份出席東區龍舟競渡大賽，臨時被邀客串司儀，仲拉埋副主席張國鈞（Horace）（圖右二）一齊講解比賽。
雖然係即場決定，「重操舊業」嘅Starry攞起講稿介紹參賽隊伍依然頭頭是道，仲同Horace一唱一搭，唔熟賽事，都似模似樣。自言第一次嚟睇龍舟比賽嘅Horace感覺樣樣新鮮，不斷向兩位專業司儀請教大龍同中龍嘅區別、混合龍舟嘅男女比例等問題。
司儀就解釋話，一般嘅中龍有一名鼓手，一名舵手，同20名划手，大龍嘅規模就大咗一倍有多，合共50人；而混合龍舟中嘅男子划手不得超過12名，即係話女子划手至少有八名。對龍舟唔係好熟嘅鄭晴今次託Horace嘅福，一齊學到嘢啦。
