圖：「大嘥鬼」咁成功全靠性格鮮明，深得小朋友歡心

　　「大嘥鬼」深入民心，佢擔任惜食大使，「使費」都好識得慳，原來過去四年，製作、推廣連宣傳費加埋只係用咗212萬元，當中160萬仲係用喺初期設計同相關啟動宣傳，即係話其後只係使咗52萬，真係好「鬼」抵！

　　環境局老友同鄭晴講，「大嘥鬼」同廣告公司嘅合約今年九月屆滿，完結前會公開招標。不過大家唔使擔心，政府換班，但大嘥鬼肯定有得留低，過渡至林鄭班子，YEAH！

　　導演爆秘聞：未娶老婆

　　大嘥鬼臉書粉絲超過4.5萬人，人氣勁到一個點。大嘥鬼上星期四（18日）啱啱慶祝四歲生日，鄭晴尋日同佢嘅形象顧問、廣告導演王嘉明吹水，聽佢大爆秘聞。唔講唔知，原來好多人關心大嘥鬼會唔會娶老婆，仲有幾多家族成員。王大導話，其實大嘥鬼得四歲，年紀仲好細，未咁快娶老婆生兒育女。至於家族成員，前排母親節出現過「大嘥媽」，其實之前仲出現過大嘥祖先、表弟、表妹。

　　唔少人會發現，近年大嘥鬼走「抽水」路線，包括早排廚師Look扮霆鋒，呼籲市民「就算腍曬嘅雞蛋仔，都一定要食曬佢㗎！」王導演話，抽水最高境界係反應快、抽得過癮、切忌過火，佢憶述大嘥鬼第一次抽水，係前年四月有電視台搞掟蛋糕宣傳，創作團隊本住試嚇心態，設計一張掟蛋糕圖片，提醒大家「蛋糕要用嚟食嘅，唔係用嚟嘥！」反應出乎意料的好，所以一直延續。