「佔中」發起人戴耀廷,成日「唯恐天下不亂」,佢尋日又提出謬論,話要「雷動」澳門立法會。佢話,由於澳門基本法無「雙普選」嘅承諾,所以今屆澳門立法會選舉可以視為澳門要求「雙普選」嘅「民間公投」。「戴丑」話澳門可以參考香港「雷動計劃」,大家事先做好協調,希望大家一齊「雷動」澳門。佢又自設標準,話有兩個條件,第一就係聲稱只要支持「雙普選」嘅參選名單,加埋總得票率達50%以上,就可以視為澳門市民支持「雙普選」喎!第二就係話,澳門現時有14個直選議席,只要取得八席,就可以增強爭取「雙普選」實力。
嘩!「戴丑」嘅「雷動」計劃喺香港都被人狂插,想喺下屆區議會選舉搞局嘅「風雲」計劃又無人理,而家佢居然發夢「踩過界」,搞埋澳門,想害人啊?網民當然鬧爆「戴丑」。Thomas So留言話:「澳門23條立咗法可以拉啲擾亂公眾人物。」網民Emily Lau說:「佢咩身份啊!又不是澳門公民!這正正顯露佢嘅狗尾!只會破壞政府機關,無視市民需要嘅假學者!」鄭晴都覺得,戴耀廷呢個建議唔單止過唔到海,佢咁樣四圍搞局,分分鐘讓自己「雷動」落海囉。
鄭晴