熱血公民立法會議員鄭松泰喺舊年10月嘅立法會大會期間，公然兩度將建制派議員座位上嘅五星紅旗同區旗倒插（右圖），引起社會憤怒，立法會仲為此專門成立咗譴責鄭松泰議員嘅調查委員會。該委員會尋日召開第三次閉門會議，主席梁美芬會後話，已發信畀包括鄭松泰在內嘅部分議員要出席研訊，首次研訊將會喺下月召開。
所謂「坦白從寬，抗拒從嚴」，其實成件事嘅過程被全程錄像，全香港人都睇得清清楚楚，鄭松泰無論係出於貪玩抑或係博出位，鐵一般嘅事實都擺在眼前，無從狡辯，之不過如果佢肯出席研訊承認錯誤，都算係對自己嘅行為負責。可惜佢今次就用事件已進入司法程序為由做擋箭牌，拒絕出席，咁嘅做法無非都係掩耳盜鈴，自欺欺人。
