圖：「長洲覆核王」郭卓堅又輸了，兼要付300萬訟費\資料圖片
過去多次利用法援提出司法覆核的「長洲覆核王」郭卓堅終嘗苦果。呢位「覆核王」早前又再胡亂提出司法覆核，指特首梁振英喺四年前宣誓就職時，讀漏「香港」兩個字，要求法庭頒令宣布該次宣誓無效及無權就任特首。鄭晴知道高等法院尋日頒下判詞，拒絕受理佢提出嘅司法覆核，仲判郭須賠訟費。
由於此案郭卓堅不獲法援，估計訟費達300萬，郭卓堅口口聲聲話已有心理準備破產！佢都算有自知之明，話唔會發起眾籌，應該知道自己唔會受市民歡迎，眾籌喎，隨時一蚊都冇，咁就真係羞家啦！
判詞仲狠批郭卓堅，話佢嚴重延誤四年先至提出司法覆核，但又未有提出好嘅理據；而梁振英讀漏「香港」是無心之失，並非拒絕宣誓，所以判郭敗訴。
團體批「訟黨」涉包庇
本報早前都踢爆過郭卓堅多年嚟一直用法援，進行大大小小嘅司法覆核，其中更涉隱瞞資產申請法援。呢的咁嘅行為，好多市民早就睇唔過眼啦。團體「珍惜群組」尋日早上就由金鐘統一中心遊行到立法會門外請願，投訴嘅就係公民黨同埋其他人濫用司法程序，又批評公民黨涉嫌包庇郭卓堅等人不停司法覆核，濫用公帑製造滋擾，視司法如遊戲，要求政府認真徹查。
