尋日佛誕日，原來咁啱係工聯會立法會議員黃國健（KK）生日，一班工聯會立法會議員，郭偉強、何啟明、麥美娟同埋陸頌雄，就去咗KK嘅議員辦公室幫佢慶生，送上四張手工精美嘅生日卡外，仲好抵死咁送張巨型嘅八達通道具畀壽星公，唔單止有黃國健嘅Chok樣，仲貼咗好大個兩蚊喺上面。生日禮物送八達通，唔通想祝KK喺政壇四通八達？
原來今年係KK65歲生日，夠秤申請返張長者八達通，可以加入「長者兩蚊乘車優惠」嘅行列，無論過海、搭港鐵定小巴都只需兩蚊，正式成為「兩蚊黃」。黨友郭偉強、潘佩璆亦都喺Facebook祝佢生日快樂，仲叫KK得閒多搭車出街添。麥美娟就話雖然KK踏入耆艾之年，但心境同個樣依然好後生，睇來KK駐顏有術，不少黨友都非常之羨慕喎！
