自從「青年新政」梁頌恆同游蕙禎丟失議席，儘管補選時間表都未出，反對派已「爭崩頭」，搶住話要入勝算最高嘅新界東爭位。學聯前常委張秀賢尋日就證實之前嘅傳言，話自己有意參加新界東補選，近幾個月仲詢問過不同政黨，更加同「青政」密切溝通，仲搵埋一班「本土派」既獨立區議員支持，似乎想食住本土派支持者條水同傳統反對派「鍊過」。不過「港獨」早就係票房毒藥，到時張秀賢分分鐘係「被鍊」。
其實反對派內部早已分崩離析，打新界東主意嘅人又點止張秀賢一個，新同盟范國威，以及同佢反咗面嘅「師父」鄭家富亦都蠢蠢欲動。
千祈唔好以為內訌咁就完，前公民黨成員、去年被裁定襲警及拒捕而被判監嘅曾健超出獄嘅時候都反口有意爭埋一份㗎，不過佢就未決定落戶新界東定九龍西喎！大家真係有排「食花生」啦！
