圖：市民想現場睇搶包山，記住嗰晚要趁早排隊拎入場券，同埋留意天氣變化

　　下星期三佛誕假期有咩做？入長洲欣賞太平清醮飄色同搶包山比賽，都不失為一個好選擇。運輸署預測當日有六萬人次出入長洲，多過舊年5.5萬人次。

　　雖然咁多人湧入長洲，不過唔使驚，當日來往長洲、中環同埋香港仔嘅渡輪將會加密班次，而新渡輪喺賽後，即係周四凌晨1時15分加開特別班次，接市民返中環。出入係就係方便，但想現場睇搶包山，記住嗰晚要趁早排隊拎入場券，同埋留意天氣變化。

　　真林鄭「小林鄭」或相遇

　　今年搶包山比賽如常喺北帝廟遊樂場足球場舉行，四個觀眾席可納約1650人觀賽。入場券會喺當晚10點開始派發，想睇比賽就記得去長洲消防局側的北社一里沿冰廠路排隊。每人限拎一張，先到先得，額滿即止。

　　天氣方面，天文台預測當日有一兩陣驟雨。留意喇，假如一個唔好彩，比賽前三小時天文台發出三號風球或以上、紅雨或黑雨警告，賽事就會取消。

　　嫌搶包山太夜，晏晝開始嘅飄色一樣咁好睇！長洲太平清醮值理會主席翁志明透露，今年不少飄色都以候任行政長官林鄭月娥為材，除咗幾位「小林鄭」外，林鄭本人都會親自嚟主禮。到時邊個「小林鄭」扮得最似，望住真人對比下咪知囉。