大公產品

首頁 > 文章 > 正文

良心15蚊魚蛋飯 地道輕食抗通脹

時間:2017-04-25 03:15:22來源:大公網

  圖:葵涌廣場15蚊魚蛋飯係人氣食店,皆因平靚正 大公報調查組攝

  香港地食餐飯平平哋都要40蚊,不過葵涌廣場有一間抗通脹良心食店,佢哋嘅「15蚊魚蛋飯」,簡直係學生、OL主食,逢食晏時段,例必大排長龍。唔少街坊幫襯完都豎起大拇指話「平靚正」。有個喺附近返工嘅男售貨員,唔止大讚好味道,仲讚埋老闆娘好人,所以成日嚟幫襯。

  鄭晴都慕名而來,親自試下傳說中嘅15蚊魚蛋飯,醬汁甜中帶辣、辣中帶甜,香濃美味,價錢平得嚟味道都相當唔錯。講真就唔算好大碗,不過OL時尚輕食,同時食到童年「篤魚蛋」陣味,OK啦!老闆陳生話,佢每朝開舖前煮好個醬汁,經營10多年來都有一大堅持,就係「過到自己,過到人」,烹調過程樣樣真材實料,仲要「無添加」(不加味精),街坊自然支持。

  陳老闆話,三年前原本賣得仲平,只係九蚊一碗,但租金加,售價無奈要調整下。呢間食店除咗魚蛋飯,仲有燒雞飯、腸仔飯、肉醬飯、燒賣飯等等,配備黑椒汁、芝士汁、日本豉油汁、咖喱汁,咩汁都有得你揀,最重要嘅全部都係賣15蚊。鄭晴覺得真係好抵囉,啱曬啲「長期糧尾」嘅朋友仔。

  鄭晴收到料聽聞,陳老闆年頭更進軍內地,喺深圳開店。為咗堅持食物品質,香港葵涌店嘅香魚蛋飯一度停售兩星期,當時令到大批街坊捧場客失望。為回應公眾要求,陳生決定重出江湖,重推15蚊魚蛋飯。

  不過陳老闆喺深圳嘅投資就失敗收場,計計埋埋損失咗差唔多40萬人民幣添。「可能自己經驗唔夠,今次學到好多嘢」。總結今次失敗經驗,陳老闆話未來會北上再戰!加油!

最新要聞

最新要聞

最受歡迎