大公網4月21日訊（記者龔學鳴）大嘥鬼今日喺facebook發帖，召喚各路隱世高手，邀請大家參加「流動回收點設計比賽」，一齊將出街四圍去嘅流動回收點變靚啲，近距離同街坊推動惜物減廢，做好乾淨回收。今次比賽不分組別，學生同公眾人士都可以參加，個人名義或不多於四人的團隊名義都可以參加，但每位參加者只可以提交一份作品。
到底有咩要求呢? 美觀、安全、不影響通道等，適合設於市政大廈、公眾街市、社會服務大樓等公眾地方；不設電源供應的環境下仍可運作。作品亦都要符合收集點的功能要求，包括吸引公眾關注並推廣環保及回收訊息，以及適用於接收可回收物料，包括玻璃、膠樽、充電池、慳電膽、電子廢物、電器等等。此外，作品要貫徹「惜物‧減廢」精神，需考慮實用性及製作成本，易於清潔保養；方便運輸、容易組裝，而總體不多於1.5米寬、2.5米高、1米深，運作佔地不能多於3平方米。
好啦，到咗大家最關注嘅獎品，入圍作品最多6名，每個作品可以得到港幣$ 6,000元及獎狀，而大獎只設一至兩名，每名港幣$ 10,000元及獎狀。截止報名係5月17日，大家快啲參加啦！
