圖：曾健超話唔選又想選，完美示範咩叫講大話/電視圖片

　　青年新政梁頌恆同游蕙禎因宣誓風波被DQ後，各懷鬼胎嘅反對派，都實九西同新東補選議席呢塊肥豬肉，有啲人為咗出選甚至可以去到厚顏無恥嘅地步。「佔中」時襲警及拒捕、判坐監五星期嘅曾健超，入獄前曾口口聲聲一再話，自己放棄上訴服刑，唔係為咗參加補選，點知呢，佢尋日刑滿出獄，即刻露出狐狸尾巴，面不紅耳不赤咁話會積極考慮參加補選，完美示範乜嘢叫做「大話精」。

　　曾健超無講明選邊區，聲稱會同「泛民」各政黨商討，但反對派已經為咗補選爭崩頭，要協調咁易咩？新民主同盟范國威、前學民思潮發言人張秀賢已有意出選新東，民協前立法會議員馮檢基同民協區議員何啟明，仲有社會主義行動主席鄧美晶又計劃參選九西，如果「泛民」協調失敗，最終只會上演「狗咬狗骨」嘅好戲，鄭晴就買定花生等睇！

　　曾健超舊年因為公民黨不支持佢出選立會選舉而退黨，參選社福界又輸咗，咁究竟有乜人會支持佢呢？尋日曾健超放監，公民黨無一個人嚟接佢，但社民連議員梁國雄、主席吳文遠、女「長毛」雷玉蓮、社福界議員邵家臻就現身，有網民話，曾健超加入社民連可能更啱佢嘅「爛仔」風格。

　　社工牌危危乎

　　曾健超雖然出獄，但仍有一身蟻，因為佢嘅犯罪事實觸犯社工條例，下月底要面臨社工專業操守紀律聆訊，理應要釘牌。但佢死撐話唔擔心被取消社工資格，仲話「對得住天地良心」。嚇！講良心？都係網友講得啱：「佢根本無良知，又點會明白天地良心嘅意義？」

　　鄭晴