圖：尋日圓朗非常熱鬧，有好多市民圍觀舞龍舞獅。小朋友都有力出力，舞起小獅子/大公報記者何嘉駿攝
香港舊時捕魚業發達，天后係船民同漁民嘅保護神，整個香港有天后廟五、六十間之多，分布喺港島赤柱、香港仔、筲箕灣、九龍油麻地、新界長洲、坪洲等地。尋日適逢一年一度嘅天后寶誕，各區大事慶祝。
鄭晴尋日路過元朗，見到幾十隊來自各鄉鎮嘅花炮隊伍，喺區內巡遊，沿途敲鑼打鼓、舞龍舞獅，圍觀嘅市民人山人海，熱鬧非凡。鄭晴有同事喺筲箕灣都咁啱撞到有天后誕嘅舞獅表演，現場仲有LED燈柱和噴煙，吸引咗好多街坊睇熱鬧。青年民建聯主席顏汶羽也湊熱鬧，去咗拜下天后娘娘睇下舞獅。佢睇嗰隊舞獅唔係喺天后廟，而係喺中環海濱摩天輪下表演，夠曬特別。元朗區議員、工聯會立法會議員陸頌雄就話，香港仲保留咗好多好似天后誕巡遊呢啲傳統文化，當局應該探索同推廣，又可吸引遊客，帶嚟經濟效益，又可以加深年輕一代嘅文化認同感同民族歸屬感，有文化承傳嘅意義。
