圖：十本最受歡迎借閱嘅書籍有九本係旅遊書

　　大家有幾耐無去過圖書館呢？又或者，大家鍾意去圖書館借咩書呢？民政事務局書面回覆立法會議員提問，大家估下舊年成人中文非小說類書籍嘅頭十位係邊十本書呢？

　　其實都好容易估啫，十本之中，有九本都是旅遊書，當中有七本都係日本，睇嚟香港人真係真係好鍾意去日本，似乎想去勻成個日本添。第十位就係《日本北海道：札幌、小樽、旭川、登別、洞爺湖》，借閱量高達8777次。至於第七位，就係《日本中部：名古屋 金沢 高山 白川鄉食玩買終極天書》，借閱量高達9692次。至於港人經常去嘅東京，《東京食玩買終極天書》排名第二位，借閱量有12859次。

　　應考天書 館藏得1009本

　　其餘兩本唔係日本嘅旅遊書，一本就係關於首爾及濟州，排名第八，另一本就係新加坡，排名第五。好啦！到底第一位係咪都係旅遊書呢？係咪都係日本呢？恐怕大家要失望啦！因為第一位就係《香港中學文憑考試．中國語文》，借閱量有12933次。點解咁受歡迎啊？鄭晴八返來，話呢本《香港中學文憑考試．中國語文》係由香港考試及評核局出版，附評卷參考及聆聽考試光碟，亦包括之前數年嘅試題專輯，可以話係應考必備，難怪咁多人借啦。不過，呢本書圖書館館藏數量只有1009本，鄭晴覺得真係名副其實「書到用時方恨少」囉！

　　鄭晴