立法會發展事務委員會組成嘅考察團下星期就會上惠州、河源一帶考察東江水工程。曾經多次因為帶埋示威物品被拒入境內地嘅社民連梁國雄（長毛）亦係今次考察團成員，佢尋日朝早去中旅社申領一次性通行證，預計今個月11日就會知道係咪獲得批准。聽講長毛本來係打算申領10年期回鄉證，不過今次因為無帶特區護照，加上時間緊迫，先改為申請一次性通行證。
長毛話今次返內地以公務為目的，怪責立法會秘書處唔幫佢申領證件，話佢哋係倒退，又話咁係不禮貌表現。長毛話，佢以前曾經帶請願信同特別服飾而被拒入境，認為入境唔應該有服飾限制。既然你都知係公務，就唔好搞事啦，而家明明係自己申請回鄉證又唔帶護照，仲要賴秘書處唔幫你？真係以為做議員大曬咩。唔該今次真係唔好再搞搞震，珍惜考察東江水嘅機會啦。
