美食車先導計劃成效未似預期！各營運者做咗兩個幾月生意，已經有人嗌曬救命，話好多營運點要蝕住嚟做，甚至有人未開檔，先投降，離場止蝕。雖則是打開門口做生意，有賺有蝕好平常，但其實好多立法會議員諗盡計仔幫下手，就好似民建聯蔣麗芸（Ann姐）咁，佢尋日喺立法會特別財委會上建議政府安排場地，畀啲美食車夜晚一齊做生意，就連商務及經濟發展局局長蘇錦樑都話有得諗！
抽籤決定營運點
除咗Ann姐外，飲食界議員張宇人都出聲話，計劃唔應該「斬腳趾避沙蟲」，唔可以因為生意差就叫停，相反要諗下點改善，例如畀啲美食車試下去唔同地方擺檔，多啲空間生存。
至於經民聯副主席林健鋒早前同鄭晴講，認為美食車嘅營運地點係抽籤決定，近民居嘅景點生意唔錯，而部分位置平日就無乜生意，到周末就做到唔停手，建議當局應該靈活安排營運者，等佢哋可以喺固定經營地點之外嘅人流密集、又有配套嘅地方停泊。
蘇錦樑回應時講到會考慮唔同建議，仲指先導計劃家陣先開始咗兩個月，希望可以先定咗啲規矩，再觀察多一段時間先再完善計劃。要令美食車計劃起死回生，睇嚟一啲都唔容易！
