香港中華出入口商會將會舉辦五個大型活動慶祝香港回歸。大公報記者龔學鳴攝

　　大公網4月5日訊（記者龔學鳴）今年係香港回歸二十周年，好多團體、商會都會搞活動慶祝，香港中華出入口商會都唔例外，大約花八百萬搞今次慶祝活動。到底有咩慶祝活動呢?當中有五個比較大型啲嘅活動，例如聽日舉行嘅慶回歸悅讀嘉年華暨「悅讀，從少年起步」新書發布會、邀請1000名學生參加書展、舉辦進出口企業大獎2017、中出論壇等，不過當中重頭戲就係六月搞嘅「尋根追夢．同心同行」真人show。

　　呢個真人show嘅對象以青年為主，活動就會安排幾個後生仔，包括青年企業家、大學生，由內地讀書、創業嘅香港青年帶領佢哋，圍繞「尋根」、「追夢」等主題，一齊去遊歷北京、南京、上海、杭州同深圳，了解一下內地嘅變遷。壓軸就係喺深圳前海青年夢工場，與廣東省粵港澳合作促進會攜手舉辦「尋根追夢．同心同行青年論壇」。

　　幾個後生仔返內地，即係咩人先合適呢? 負責今次活動嘅香港中華出入口商會副秘書長彭楚夫就話，最好就係一啲對內地無咩認識、無領過回鄉證，又或者外國回流返港嘅後生仔，咁樣就可以有啲矛盾同火花喎。會唔會請啲名人，例如青年事務委員會主席劉鳴煒參加呢? 常務會董陳少山話，始終唔係一個娛樂節目，所以希望係普通後生仔參加。另外，呢個真人show全程預算十日，又會安排專業攝製團隊拍攝，製作成特輯就會喺電視台或網絡上面播放。真係好令人期待喎！

　　另外，中出亦都搞咗一個「青年壯志 I am the Boss」資助計劃。呢個係一個創業配對基金，為18至35歲嘅青年提供每人最多45萬創業基金。負責基金嘅副會長許華傑就話，希望透過計劃，一方面提供資金，一方面提供導師，可以幫助有志創業嘅青年。基金總共有450萬，四月初已經接受申請。如果希望創業嘅後生仔，就記得提交計劃書同埋向中出申請啦！