圖：林鄭尋日下晝舉行咗場茶敘答謝團隊
林鄭月娥自一月中宣布參選特首選舉以來，一直同競選團隊「同行」，全力以赴做好選舉工程，最終取得勝利，團隊上下當然相當高興啦。尋日下晝，林太就舉行咗場茶敘，答謝團隊嘅努力同支持。林太丈夫林兆波、大仔林節思也全程陪同在旁。
林太在茶敘切完蛋糕後，眾人就爭住同佢影相，場面非常熱鬧。有林鄭團隊中人透露，林太尋日朝早同團隊成員食完早餐後，就到會展等睇點票，當宣布佢當選後，團隊上下又要出席記者會，其間一直都無時間食飯。直到下晝四點左右，團隊同候任特首辦傾完交接工作嘅安排後，大家就一起到君悅酒店會客室食下午茶。
亦有團隊中人透露，林太響茶敘中感謝團隊上下響競選期間為佢做咗好多工作，又話選戰到咗今日終於打完，覺得有啲傷感，而林太亦有同團隊嘅年輕成員還有工作人員逐個合照，全無架子。
