佟曉玲（中）等舉行「賬號開通儀式」

　　大公網3月22日訊（記者龔學鳴）網上平台成為時代趨勢，中華人民共和國外交部駐香港特別行政區特派員公署都唔執輸，昨日(21日)以專頁形式登錄社交網站facebook，仲有藍剔認證，絕無花假。

　　專頁前日上午11點發出第一帖，上載公署全景相，又親切邀請「大家得閒來傾下計啦」，有網民即時大讚「公署好靚」。專頁傍晚就發帖舉行「賬號開通儀式」，署理特派員佟曉玲在貼文中致辭話：中國已成為世界網民第一大國，此次公署開通臉書官方賬號，「為我們的公共外交工作插上了翅膀，為公署與香港民眾交流溝通搭建了一個新平台」。佢又話，公署將利用賬號介紹國家發展、外交工作、涉港外交、中華歷史與文化等內容，公署亦將積極回應網民關切。

　　專頁「一開張」就通過輕鬆幽默嘅方式介紹中國外交情況，例如分享咗《人民日報》一張新聞照片，提到一名中國赴利比理亞維和員警防暴隊隊員，回國後同無見一年嘅新婚妻子擁吻，帖文話：「后面班朋友……笑到咁…………點笑都搶唔到鏡啦，咁呢個場面，講真又真係幾warm噶。聯合國安理會有5個常任理事國，而派出維和人員最多噶就係中國啦，亦係第二大出資國。依家有3000幾名維和人員係南蘇丹、黎巴娕、馬里等地執行和平任務。」專頁大獲網民好評，開通不足兩日已獲逾500個「Like」啦。