「咦，呢個咪係林鄭月娥？」政府尋日成立候任行政長官辦公室，好多網民見到辦公室秘書長丁葉燕薇張相嗰陣，第一反應都係認錯佢係特首候選人林鄭月娥。就連鄭晴望落，都以為係「孖生姊妹」，因為無論面形、髮型，同埋氣質，至少有九成相似。其實女高官同林鄭「撞樣」並非首次，前民政事務總署署長陳甘美華都曾被話激似林鄭，不過佢就已經退休，想整張「偽三胞胎」同台合影，都幾艱難！
講返呢個新成立嘅辦公室，其目的在於確保兩屆政府嘅順利交接，共設有五名首長級人員同超過二十名非首長級人員。而家政府已調派公務員出任其中四個首長級職位，包括候任行政長官辦公室秘書長、候任行政長官的私人秘書、副私人秘書及新聞秘書。
丁葉燕薇激似林鄭
而擔任秘書長嘅丁葉燕薇原本係香港郵政署長，之前仲擔任過發展局副秘書長、保安局副秘書長，仲喺多個決策局同部門服務過。如果林鄭當選，大家以後或者可以不時見到這對「姊妹」一同上陣呢！
鄭晴
