青年民建聯同大家分享返過去兩年嘅青年工作！
大公網3月13日訊 青年民建聯（青民）即將換屆，佢地下晝就搞咗個傳媒茶敘同大家分享返第六屆青民嘅工作。青民主席顏汶羽（Frankie）話，第六屆青民編制同之前唔同，主席同副主席五人唔再按地區劃分工作範圍，而係按事務分工，令工作擴展到工商等唔同事務。
Frankie希望今屆青民嘅工作方向未來可以延續落去，又話因為今屆青民撞正三個選舉期，兩年任期入面，有九個月都因為選舉要避嫌，有好多畀青年人同局長、名人接觸嘅活動，以至網上宣傳都要暫停。Frankie認為，今屆青民如果要講工作上做得最不足嘅就係落區唔夠，其次就係網絡宣傳因為人手唔夠而有不足，相信過咗選舉會有更多時間落區。活動雖少但都相當受歡迎，Frankie話之前安排青年人同劉鳴煒食大牌檔，同歌手狄易達打邊爐等都有好多人參加，希望青民能夠繼續成為青年人同各界溝通嘅平台。
青民副主席林琳Nixie話，之前佢見政制方面嘅官員時都有反映，希望局方檢討一嚇比較過時嘅選舉條例，好似用whatsapp宣傳其實好難計算選舉經費，希望有關方面能夠與時並進。
