身為全國政協委員嘅前一哥鄧竟成（鄧Sir），年年到北京出席會議，都會趁呢半個月時間操fit。佢仲搵到個最好嘅鍛煉方法，就係從貴賓樓飯店行路去人民大會堂開會。呢兩年，多咗政協委員同鄧Sir一齊行，佢哋仲笑稱自己係政協「暴走族」。
今年一開會，佢哋即刻開始「暴走」，鄧Sir同建築師學會前會長林雲峯、香港聖公會大主教鄺保羅用咗18分鐘，就已經從駐地抵達會場，真係分分鐘快過搭車。鄧Sir尋日被傳媒不斷追訪，佢話，遠喺香港嘅孫女喺電視上見到爺爺好開心添。
