今屆行政長官選舉期撞正全國兩會會期，令身兼林鄭月娥競選辦主任嘅港區全國人大代表陳智思（Bernard）都要喺香港、北京兩邊跑。尋日朝早見到啱啱開完人大預備會議嘅Bernard。佢話前晚抵達北京，尋日晏晝就要飛返香港，準備出席今日嘅特首候選人簡介會，同埋民主思路舉辦嘅特首選舉論壇，今晚又會趕夜機返北京，行程真係非常緊密。

　　講到連日選舉工程嘅感受，Bernard就大嘆，市民唔會以同一把尺嚟睇每位候選人，佢哋嘅團隊幾乎做啲咩事，都會有機會受人批評，但就唔覺另外兩個候選人曾俊華、胡國興會受到同樣嘅對待。所以，佢哋團隊唯有選擇行保守路線。

　　邊個能力最高大家都知

　　問及隨住特首選舉論壇臨近，會唔會同林太做啲準備工夫，Bernard話，「三個（候選）人入面，邊個能力最高，其實大家都知」，所以唔會要求林鄭在論壇上表現自己叻過兩位對手，而係應該把握機會，向公眾表現自己嘅處事能力同作風。佢仲話，留意到「民主300＋」入面，社福界同衛生服務界有啲選委都認同林鄭嘅政綱內容，相信到咗投票階段，林鄭會吸納到部分反對派嘅支持。

　　其實，除咗Bernard，競選辦仲有三人都要開兩會，包括身為人大代表的副主任陳振彬、陳勇，以及本身係政協委員嘅陳清霞（Eliza），咁啱得咁蹺，大家全部都姓陳添。Eliza都話自己要兩地奔波，星期日返港，下周四再返來開會。選舉日臨近，睇來「陳家班」仲有排忙啊！