影片中小學生建議同學要求父母購買人壽保險，因為賠償金很高。香城映畫網上片段截圖
大公網2月28日訊 網上最近熱傳一條微電影短片，故事入面有小學生因為接受教育時遇到嘅壓力問題萌生厭世念頭，後來同同學諗出唔少劍走偏鋒、不符一般道德、常理嘅方法規劃未來生涯，例如靠父母人壽保險賠償應付生計咁。民建聯立法會議員葛珮帆（EQ）尋日喺傳媒茶敘提起呢條片，佢話留意到家長反應兩極，有家長覺得睇完覺得好恐怖，擔心小朋友睇完條片會諗歪，亦都有家長睇完認為有警醒嘅作用。
EQ建議家長留意家中孩子有無睇過有關短片，思考點樣令小朋友用正面嘅態度面對問題。
EQ就話，佢當然好支持制片者嘅創作自由，亦認為短片制作得相好好，不過建議相關人士可以考慮一下用呢種較為負面嘅創作手法可能帶來嘅後果，因為大人睇完會識得分析同有反思，但如果小朋友自己睇完，分分鐘會植入一啲較為危險嘅思想，建議喺片段之前加入建議由家長陪同收睇等字眼。EQ又話，而家已經無辦法令小朋友唔睇呢條片，所以佢呼籲家長留意自己嘅仔女有無睇過呢條片，同佢地傾嚇，思考點樣令小朋友用正面嘅態度面對問題，同時仲可以了解多啲小朋友嘅諗法。
