下星期二就係情人節，食物及衛生局局長高永文為咗出席同鄉香港潮屬社團總會創會主席陳偉南嘅百歲壽辰宴，今年唔可以同高太過浪漫二人情人節。高醫生仲懷住畀人鬧嘅忐忑心情，邀請太太一齊出席，當然善解人意嘅高太點會拒絕，仲好支持高醫生，齊齊出席壽宴！不過，高醫生都會係買兩紮玫瑰花送畀太太，仲偷偷咁講「花，梗係偷偷地買」！各位男士睇到啦，連咁忙嘅高醫生都已經諗好點冧太太，唔好再以忙為藉口，好好諗下送啲咩畀另一半，等佢過個驚喜情人節！
