圖：「耀才證券」每年均會在農曆新年首個交易日，走遍全線20間分行，大派開運利是給所有客戶

　　恭喜發財，利是來！尋日年初五，係普遍公司機構的啟市日，亦都係打工仔向老闆開工利是嘅吉日。鄭晴作為資深打工仔，深明利是個「餡」對打工仔有幾重要。經打探各行業行情發現，有中資銀行開工利是豪派兩張金牛，真係恨死隔籬！

　　今年中資銀行受惠於內地經濟持續增長，開工利是大部分以三位數起跳，其中，信銀國際出手最闊綽，每位開工利是2000蚊。香港海洋公園封利是亦同樣唔嘢少，全職員工每人派1200蚊，兼職員工都有600蚊。

　　至於年中無休嘅飲食業，金百加集團主席黃家和透露，今年派50至100蚊，銀碼同以往相若。佢話，開工利是係傳統習俗，唔少得，而僱主如果想慰勞員工過去一年嘅辛勞，最實際嘅係從獎金、福利入手。

　　有人歡喜有人愁。作為香港最大僱主之一的滙豐銀行，今年終於恢復派開工利是，雖然得張廿蚊雞，但點都好過前年市傳派朱古力金幣。至於恒生銀行、星展銀行今年同樣維持派20蚊。

　　航空業情況都大不同，近年節流兼瘦身嘅國泰航空，同埋國泰港龍，今年派20蚊開工利是。生意愈做愈好嘅香港航空、香港快運，就每人派100蚊。

　　開工利是雖然總係「隔籬飯香」，不過講到底，其實都係攞個好意頭，與其着眼於一封利是，打工仔倒不如勤力做嘢，博升職、博加人工好過啦！

　　鄭晴