仲有一日就到雞年，相信民建聯副主席陳克勤都同唔少市民一樣，希望新年勝舊年喇。事關克勤話，自己喺年廿七，就過咗猴年最黑嘅一日，究竟所為何事呢？
克勤前日喺自己嘅Facebook發帖，話自己24號凌晨牙痛，痛到失眠，只係瞓到三個鐘。之後，佢一早就要趕返去立法會，連續主持《私營骨灰安置所條例草案》委員會同保安事務委員會議，搞咗四個鐘先可以搵醫生剝牙，剝完又要繼續開會。
以為已經夠曬黑啦，點知克勤揸車嗰陣，架車畀人撞到。克勤話，「好彩有吉星化煞，人沒有損傷」。唔止咁，克勤之前仲畀傳媒報道，自己喺馬鞍山嘅賀年橫額，自己個名被寫錯咗做「陳克勸」添，真係超級黑仔。不過，克勤都態度正面，話正所謂「否極泰來」，希望新年過後運程會好轉，雞年行大運。
