教練教路，比賽開始前一個鐘就會去到場地，先慢跑、拉筋，做好熱身。
星期日朝早就係第四屆嘅香港街馬賽事，今年除咗以往嘅十公里同半馬賽事，更加首次增加32.195公里賽事。運輸署嗰日凌晨一點至中午十二點半會喺九龍分階段封路，亦會有臨時嘅交通、公共運輸安排，想去參賽或者睇比賽嘅朋友就記得留意喇。
今年參加比賽嘅人數由舊年嘅一萬人上升至今年一萬五千人，為咗方便大家當日出入，起動九龍東辦事處開發嘅MyKE手機應用程式到時會有穿梭巴士、渡輪等預計輪候時間、 交通工具的排隊情況畀市民收睇附近嘅交通資訊。起動九龍東副專員黃德才話，今次用MyKE手機應用程式管理人流，可以為市民提供交通資訊，有助市民選擇自己前往目的地的交通方法，長遠有助解決九龍東內長期的交通問題，亦有助將來全港發展成智慧城市，將來可能仲會加入地區性嘅空氣污染指標，更貼心咁幫助市民。
上屆街馬半馬冠軍嘅專業教練黎可基就教路，話比賽當日都預咗會人多，比賽開始前一個鐘就會先去到場地，用三個字時間慢跑、拉筋，做好熱身。而另一位教練潘永成亦建議跑手比賽前飲300至500毫升水，跑緊中途都要記得補充水分，不過每次飲一啖就夠喇。
